Skip to main content
Հետադարձ կապ

Առողջ նախաճաշի 3 փորձված և սիրելի տարբերակ

Լավ սնունդը ճանապարհ է հարթում երեխայի զարգացման համար՝ օգնելով նրան՝ մեծանալու երջանիկ և առողջ:

«Էժան և որակով» մրցանակակիր խոհարարական գրքի հեղինակ Լինե Բրաունը ն է, մեզ՝ զբաղված ծնողներիս, հրավիրել է իր խոհանոցմի քանի գաղափար ներկայացնելու համար:

Փորձե՛ք այս բաղադրատոմսերը 1 տարեկանից բարձր երեխաների համար, եթե դեռ չեք փորձել: Դրանք հեշտ են, սննդարար և համեղ:

1. Լոլիկով ձվածեղ

Այս ուտեստը շատ ավելի համեղ է լոլիկի սեզոնին, երբ համեղ ու վիտամիններով հարուստ լոլիկ կա: Այն մատուցեք տոստ արված հացի կամ լավաշի կտորներով։

Բաղադրությունը

1/2 ճաշի գդալ (7գ) կարագ

4 փոքրիկ (կամ 2 խոշոր) մանր կտրատած թարմ լոլիկ

4 ձու

Հավելումներ. Վրան շաղ տվեք մանր կտրատած թարմ ռեհան կամ այլ կանաչի։

Ինչպես պատրաստել

  1. Կարագը միջինից բարձր ջերմության պայմաններում հալեցրեք փոքր կամ միջին չափի չկպչող թավայի մեջ՝ շրջանաձև շարժումներով այն տարածելով թավայով մեկ: Ավելացնել լոլիկները և եփել այնքան, որ հյութը դուրս գա և մեծամասամբ գոլորշանա, այսինքն՝ 5-ից 7 րոպե.
  2. Այդ ընթացքում կոտրել հավկիթները, միջուկը լցնել թասիկի մեջ ու թեթևակի հարել պատառաքաղով.
  3. Կրակը թուլացնել և հարած ձուն լցնել թավայի մեջ: Փոքրիկ թիակով ձուն խառնել լոլիկի զանգվածի հետ։ Խնամքով ու անընդհատ խառնել, որպեսզի ձվից գնդիկներ չառաջանան: Կրակը հնարավորինս թուլացրեք. որքան դանդաղ եփվի ձուն, այնքան ավելի համասեռ կլինի:
  4. Երբ ձուն եփվել է, անջատեք կրակը և ավելացրեք նախապես կտրատված կանաչին: Ռեհանը հիանալի է համադրվում լոլիկի հետ: Ես սիրում եմ, երբ ձվածեղը թույլ և հյութեղ է լինում, իսկ ձուն կազմությամբ նմանվում է փափուկ կաթնաշոռի: Եթե ավելի չոր եք սիրում, ապա կարող եք փոքր ինչ ավելի երկար եփել:

Ահա, թե ինչու է սա նախաճաշի լավագույն տարբերակներից մեկը։

Ձուն համարվում է սպիտակուցի «կատարյալ» աղբյուր, քանի որ այն պարունակում է բոլոր ինը հիմնական ամինաթթուները, որոնք երեխաների աճի համար ամենաանհրաժեշտ նյութերն են: Ձուն հարուստ է սելենով, D, B6, B12 վիտամիններով և այնպիսի հանքանյութերով, ինչպիսիք են՝ ցինկը, երկաթը և պղինձը:

Լոլիկն ապահովում է C և A վիտամինները, որոնք հրաշալի/անփոխարինելի են ձեր երեխայի իմունային համակարգի համար, ռեհանն էլ, իր հերթին, հարուստ է վիտամիններով:

Ամբողջական հացահատիկի ալյուրից պատրաստված հացի կտորները կամ լավաշը կարող են մանրաթելի լավ աղբյուր լինել։ Բայց խուսափեք շաքարի հավելումով հացամթերքից:

2. Մի ուրիշ վարսակի շիլա

Շիլան տաք և հագեցնող նախաճաշ է, որը ձեր երեխային և ձեզ կապահովի անհրաժեշտ էներգիայով՝ ապահովելով առավոտվա հրաշալի սկիզբ: Հասարակ վարսակի շիլան համարվում է ձանձրալի ուտեստ, սակայն այս բաղադրատոմսով այն կարող եք մատուցել ամենատարբեր ձևերով և  երբեք չձանձրանալ:

Ուտեստի հիմքը ամենասովորական վարսակի շիլան է: Այն պատրաստեք ինքնուրույն: Շիլան կարող է լինել կաթնային, մրգային կամ համեմված. միշտ էլ կարող եք գտնել առավոտյան մեկ ափսե տաք շիլան ձեր երեխաների հետ վայելելու ձե՛ր սիրելի տարբերակը:

Բաղադրությունը

1 բաժակ (100գ) վարսակի փաթիլներ

2 բաժակ (500մլ) ջուր

Հավելումներ. 1/2 բաժակ (50գ) տրորված միրգ կամ առողջարար մեկ այլ բան, օրինակ՝ ընկույզ: Զարմանալ կարելի է, թե քանի տարբերակ կարող եք մտածել՝ պարզապես ինչ-որ նոր միրգ փորձելով կամ մի քանի միրգ համադրելով:

Մատուցելու եղանակը. վերը նշված քանակը նախատեսված է 2 մեծահասակի համար: Փոքրիկ երեխայի համար վարսակի փաթիլների առաջարկվող քանակը մոտ 1/3 բաժակն է (30 գ):

Ինչպես պատրաստել

  1. Վարսակը և ջուրը լցրեք փոքրիկ թասի մեջ և միջին ուժգնությամբ կրակի վրա հասցրեք եռման աստիճանի: Անմիջապես թուլացրեք կրակը և կափարիչով ծածկեք կաթսան։.
  2. Եփեք 5 րոպե՝ մինչև վարսակը փափկի և փխրվի, իսկ ջրի մեծ մասը՝ գոլորշանա: Կարող եք ջուր ավելացնել, եթե շիլան թեթև և ջրիկ եք սիրում, կամ հակառակը՝ ջուրը սկզբից քիչ լցրեք, եթե սիրում եք թանձր շիլա:


Ահա թե ինչու է սա նախաճաշի լավագույն տարբերակներից մեկը։

Պրոտեինի, մագնեզիումի, երկաթի և ցինկի բարձր պարունակությամբ վարսակը օգնում է ձեր երեխայի իմունային համակարգին, և այն էներգիայի շատ լավ աղբյուր է:

Մանրաթելերով, դանդաղ յուրացվող ածխաջրածիններով հարուստ ամբողջահատիկ վարսակը ձեր երեխայի մարմնին և ուղեղին անընդհատ էներգիա է մատակարարում, որ կբավարարի նրան մինչև ճաշը։

Ավելի սննդարար դարձնելու համար շիլան հասցրեք այն աստիճանի թանձրությոն, որ այն չծորա գդալից:

Շիլայի պատրաստ լինելուց երկու րոպե առաջ ավելացրեք 1/2 բաժակ (50գ) տրորված հատապտուղներ և խառնեք մինչև միասեռ զանգված ստանալը:

3. Յոգուրտային խառնուրդներ

Մթերային խանութներում այնքա՜ն տարատեսակ յոգուրտներ կան. ցածր յուղայնությամբ և բարձր շաքարայնությամբ, որոշները՝ սիրունիկ կենդանիների նկարներով: Որոշների վրա շոկոլադի քերուկ է և կոնֆետներ: Մոռացե՛ք այդ ամենը: Ձեռքի տակ ունենալով հասարակ յոգուրտ կամ մածուն, դուք կարող եք անհավանական համեր ստանալ ձեր իսկ խոհանոցում: Ձեր երեխաներին հարցրեք, թե ինչ համեր կարող են պատկերացնել, և սկսեք ստանալ այդ համերը: Այդպես շատ ավելի զվարճալի է, քան թույլ տալը, որ սուպերմարկետն ընտրի ձեր փոխարեն: Փորձեք ինչ-որ նոր բան և ստացեք նոր խառնուրդներ: Ահա մի քանի տարբերակ։

Բաղադրիչները

Մածուն կամ յոգուրտ՝ հետևյալներից մեկով կամ մի քանիսով.

  • Մանր կտրատված միրգ (օրինակ՝ բանան).
  • Տրորված հատապտուղներ.
  • Կոկոսի քերուկ.
  • Եվ մի փոքր երևակայություն:

Ահա, թե ինչու է սա նախաճաշի լավագույն տարբերակներից մեկը։

Փոքրիկ երեխաների համար առաջարկվող չափը՝ մոտ 1/3 բաժակ (85գ)մածուն/յոգուրտն է։.

Մածունը հիանալի սնունդ է, երբ ձեր երեխային սկսում եք ծանոթացնել հավելյալ սննդի հետ (6 ամսականից հետո):

Կալցիումն ու սպիտակուցը կարևորագույն նշանակություն ունեն երեխայի ոսկորների առողջության համար:

Բարձր յուղայնությամբ մածունը ամենաօգտակարն է, քանի որ դրանում շաքարը քիչ է, իսկ մանուկների դիետայում ճարպերը պարտադիր են՝ նրանց աճի և ուղեղի զարգացման համար:

 


Լինե Բրաունը «Էժան և որակով» գրքի հեղինակն է, որ ստեղվել է խիստ սուղ միջոցներ ունեցող մարդկանց համար: Գիրքը 2015 թվականին շահել է Պրոֆեսիոնալ խոհարարների միջազգային ասոցիացիայի դատավորների համակրանքի մրցանակը: Լինեն ներառված է եղել Սննդի և ըմպելիքների գծով Forbes 30 Under 30 վարկանիշային նախնական ցանկում, իսկ Food & Wine և Fortune ամսագրերի կողմից արժանացել է «Սննդի և ըմպելիքի ասպարեզում ամենանորարար կին» կոչմանը: Նրա խոհարարական գրքի մասին ավելին կարող եք կարդալ հետևյալ հղումով։

Նույնաբովանդակ այլ նյութեր